在港島路上穿梭嘅香港電車，轉眼間已經服務咗香港近百載。以往，唔少商業機構都會藉著舉辦電車「免費乘車日」，宣傳推廣佢哋嘅品牌或者產品。而即將到來嘅4月30號，就會迎來第一次由民間舉辦嘅「免費乘車日」，就係一眾「姜糖」為咗慶祝姜濤生日，免費請大家搭叮叮！不過剛好呢日係星期六，有邊啲「姜Ｂ」打卡位，可以慶祝「姜濤誕」？小編就為各位「姜糖」整理一下！
🎂姜誕免費乘車日
姜濤4月30日生日，為咗幫佢慶牛一，姜濤香港後援會舉行電車免費乘車日。活動當日由朝早首班車至當日尾班車，乘客落車時都唔使拍卡比錢，攞正牌搭「霸王車」！
姜糖們亦可以利用呢個便利，順道沿住電車路，去姜濤在電車路上嘅景點打吓卡！
📸姜誕打卡位
📍 銅鑼灣金百利大型電視廣告
講到最搶眼，梗係呢個喺金佰利對出嘅大型廣告billboard啦！由日頭到夜晚，都可以見住姜B喺呢度出現，就算見唔到佢本尊出現，都可以喺度感受吓萬人空巷嘅氣氛！
除咗呢個大型電視廣告之外，銅鑼灣仲有兩個地方有大型billboard可以打卡，分別喺：
📍 VPOINT
地點：銅鑼灣登龍街18號-VPOINT
日期：4月19日-5月2日
📍 銅鑼灣地帶
日期：4月20日-5月22日
📍電車路｜姜誕廣告電車
Fans Club咁揼本，梗係唔可以辜負一班「姜糖」嘅心意啦！佢哋今次除咗贊助「免費乘車日」，仲包埋電車廣告！想捕捉到期間限定嘅姜Ｂ電車，梗係要睇啱「冧巴」37號，碰吓運氣！
📍 港九商場POPUP STORE ｜姜誕做善事
姜濤生日又點止落廣告！一班粉絲仲分別喺銅鑼灣同埋尖沙咀搞咗個義賣活動，包括應援身同埋紀念品，收入將會捐比慈善團體做善事，都真係幾有意義！
買完嘢做完善事，梗係唔執輸要同「小姜姜」、「小濤濤」影相啦！兩個場地都有打卡位，比你喺姜B生日留返個念！
活動日期： 4月22日至5月22日
活動時間：上午11時至晚上9時
地點：銅鑼灣皇室堡地下中庭 ｜ 尖沙咀The ONE UG2中庭
📍 加路連大樓｜ 鏡中鏡MV拍攝場景
喺食肆雲集嘅希雲道旁邊，原來有個小社區，入面四道八達、連繫住幾座大廈嘅巷仔，竟然有住古著舖同埋電單車舖、廿年嘅茶記老字號同埋丹麥餅店呢啲老舖，新舊交融得嚟又唔會互相排斥，值得感受吓呢份人情味！
📍 期間限定！姜誕主題食店
行咗咁耐，緊係要醫下肚仔！既然以「姜濤誕」為主題，不如去返有姜B應援嘅食店，嚟充充電啦！
【港島】
💛陪著你走甜品店
四款限定甜品「姜誕SPECIAL」:
夠姜桃膠湯圓、雙桃3.6牛乳燉蛋白、姜糖綿綿冰同姜啤蜜桃特飲！
夠姜桃膠湯圓、雙桃3.6牛乳燉蛋白、姜糖綿綿冰同姜啤蜜桃特飲！
地址：天后興發街62-64號美城花園大廈地下KL3號舖
活動日期：4月15日起
活動詳情：FACEBOOK
💛花斑茶社 (銅鑼灣分店)
亮點：籃球主題
地址：銅鑼灣駱克道駱克道470-472號
【旺角】
⚪Nun Desserts Café
期間限定甜品 ：「亞洲第一白桃雪冰」、「我無O嘴蜜桃沙冰」同「用作品說話甜蜜窩夫」
地址：旺角通菜街119號地舖
活動日期：2022年4月21日至4月30日
💛Aftereightyscafe （前有線記者開設）
期間限定餐點：「姜man餐」（焦糖蜜桃燒春雞、桃桃乳酪沙冰、桃桃芝士蛋糕）
地址：旺角豉油街27號
活動日期：2022年4月21日至5月13日
📍姜濤喺度讀過書！軒尼詩道官立小學、鄧肇堅維多利亞官立中學
唔講唔知，原來姜B細細個時喺軒尼詩道官小讀書，雖然你唔會專程入學校打卡，但呢幢建築物都幾有特色，啲紅磚影相都真係幾靚！至於佢讀過間中學，雖然喺附近，但就無咩值得去嘅地方嘅!
諗返造星嘅時候，又點諗到今時今日仲有咁強勁嘅追星浪潮，亦都無諗過「廣東歌」可以重新進佔香港人嘅耳膜。（講緊嘅唔係嗰啲所謂「港樂」呀！）呢種香港嘅流行文化，即使喺禮崩樂壞嘅時代，都要好好地堅持、支持到底呀！
【呢篇小編都破例返口語打，支持香港人嘅廣東歌】
資料來源：姜濤香港後援會KeungShow HKFanClub、Aftereightyscafe、Nun Desserts Café、花斑茶社、陪著你走甜品店
0 個留言