造星4完咗之後正式出道，繼《8sec》、《三分甜》和《五種愛的密語》後，Lolly Talk就為大家帶嚟今年第一首派台新歌《七姊妹星團》！今次嘅音樂班底陣容相當強勁，由Zarahn主理，周國賢作曲、小克填詞、高佬監製，原來係由Sinnie老師喺最近Tone音樂祭表演時，喺後台邀歌成功，促成咗今次嘅合作，亦都係LT送比波板糖（LT Fans名）嘅禮物。MV之中一眾妹豬以日系風格動漫戰隊登場，有氣勢得嚟又好靚！
【揀飲．簡食記全新會員系統 BEST CLUB，立即加入獲取更多獨家優惠 !】
MV嘅戰隊服裝仲要度身訂造，除咗顏色唔同之外，cutting都別出心裁，就連LT嘅耳機都係專程為今次拍攝而整！ 今次嘅MV拍攝仲邀請咗近千位波板糖通宵拍攝，由排舞、籌備拍攝、流程安排，都喺個幾星期搞掂，好似MV拍攝都只係一晚時間，到出街都只係五日時間，真係好熱血呀！一班妹豬去完日本旅行返嚟就投入排練，勁firm呀！
《七姊妹星團》同上一首歌《五種愛的密語》一樣，「七姊妹星團」都唔係普通嘅一個歌名咁簡單，而係真有其物！「七姊妹星團」原來又叫昴宿星團，肉眼就可以見到明亮嘅主星，但其實呢個星團包含咗過千粒嘅恆星，佢哋嘅引力互相牽引，先至喺銀河入面閃閃生輝。
呢首歌嘅歌詞都好令人感動，成首歌可以分為兩部分，前半部分係講「找不到路向」，「平凡像我 這種女孩 聲音未夠鏗鏘」，「我在發夢 你在發夢 置身宇宙」，七姊妹一齊「編出星宿」、「齊心追夢 手牽手」，同「波板糖圈圈緊扣」，去到music break後第二部分嘅「找得到路向」，「我沒發夢 你沒發夢 置身宇宙」，即使回到現實，八位妹豬都喺台上發光發亮，一齊「團聚更多沉默的隊友」。
－－－－－以下係小編的自肥企劃－－－－－
作為波板糖，有幸抽到成為現場拍攝嘅一員，真係無比榮幸！ 夜媽媽凌晨搭車去到拍攝現場，等待入場地嘅時候見到墟冚嘅人龍，真係好感動💛
開頭都諗緊會唔會捱唔住眼瞓，拍拍吓會瞓著，點知由開始拍攝，就已經好似睇演唱會咁，大家一齊嗌同跳，勁有氣氛！ 到妹豬喺台上拍攝中間有空檔時，都把握時間同波板糖互動，尤其深刻嘅係阿妹嘅機艙廣播、「你哋準備好未呀？」，Elka同台下猜包剪揼，阿蛋甜美嘅回應，LT寵粉真係世一💛 到凌晨大約三點幾，特別嘉賓出現，原來係周國賢同埋高佬，真係另一個高潮，亦都見證住Sinnie老師嘅自肥企劃！
去到拍攝嘅尾聲，凌晨五點幾，頭頂飛快飛過嘅航拍機，帶嚟嘅風真係好醒神，大家都依然好投入哋應援，再加埋最後蛋B、蝦蝦、Yogg喺台下行住果一幕，真係好感動！
雖然現場唔准拍攝，但可以見到妹豬們咁長時間，成個fans meet咁，真係超難得！ 多謝LT送俾波板糖嘅呢份禮物🖖🏻 同埋多謝導演、攝影師、咁多位工作人員同埋FC嘅安排，都多謝咁多位身邊嘅波板糖🥰 能夠陪伴LT，通宵都係值得㗎！LT世一！祝LT新一年大紅大紫！
【揀飲．簡食記全新會員系統 BEST CLUB，立即加入獲取更多獨家優惠 !】
0 個留言