【香港｜銅鑼灣美食💛】銅鑼灣地庫有個小曼谷！親民價是靚午超抵食 夜晚仲有live music咁大癲？

香港人都好鐘意食泰國菜，以前食泰國嘢就要去九龍城，不過依家真係四圍都食到！就好似銅鑼灣呢幢新嘅商廈地庫，竟然開咗間「小曼谷泰國美食站」，鐘意食泰國菜嘅小編緊係要試吓啦！

呢間舖以泰國火車為主題，面積唔細，所以空間感都幾大，坐低都唔迫！門口有個巨型火車頭，卡位仲模仿火車車廂，唔知係咪想營造返泰國嘅火車夜市feel呢？ 睇返資料，原來呢間「小曼谷」係九龍城嗰間嘅分店，睇嚟都幾有水準咁～

小編今次晏晝食飯時間嚟到，座無虛席就梗架啦！不過由於座位都算多嘅關係，等咗唔係好耐就有得坐低，抵讚！

午市套餐都幾多選擇，價錢仲要都幾親民！ 喺銅鑼灣黃金地段，可以70蚊左右食到個有湯、又有嘢飲嘅午餐，都算係咁啦！

泰式豬手飯

上檯個擺盤都唔係鳩整，睇落幾整齊！呢個泰式豬手都幾足料，豬手整得好入味，塊皮尤其爽脆彈牙。啲肉都整得好稔又易入口，點埋食豬手嘅酸汁，真係好開胃！豬手底部就墊咗啲新鮮嘅芥蘭 唔係啲老菜，仲炒得幾香添！ 隻滷蛋都好入味，成個份量男仔都食得！

泰式雜菜湯

呢個泰式雜菜湯有啲辣辣哋 唔太啱小編胃口，不過暖暖哋都幾好！

龍眼冰

杯龍眼冰好多龍眼，幾足料！隻杯個shape幾得意，食辣飲佢下火一流！

泰式酸辣鳳爪 

跟餐再加32蚊就有多個小食，挑起條癮想想食吓呀婆鳳爪。少少酸多多辣嘅鳳爪，愈食愈惹味，係爽嘅！不過伴碟嘅菜有少少多，如果份量可以再多少少就perfect！

聽講佢哋夜晚仲有live music 唔知大家有冇試過？又有冇feel呢？ 不妨喺下面留言區同我哋分享吓～