韓式吐司近年大受歡迎，仲要開到成行成市，不過又唔係間間都整得好食。咁呢間叫「Toasting」嘅小店，唔知又可唔可以突圍而出呢？
【揀飲．簡食記全新會員系統 BEST CLUB，立即加入獲取更多獨家優惠 !】
▌搞鬼吐司名 好味又夠gimmick？
香港地做飲食要成功，除咗真材實料之外，Gimmick都唔少得，先可以帶起人氣，呢度都好似深明此道，吐司名都幾有玩味！
║芝豬俠
全部吐司都係即叫即整，個包好香牛油味之餘又甜甜哋，中間夾住400次滑蛋，即係炒咗400次嘅蛋，食落口感真係好滑好軟綿綿！
蛋味濃得嚟又唔會太水，兩塊豬柳煎得微焦幾香，唔會太油，食到底部都仲有餡料，無偷工減料，抵讚！
║芋芋鬆
吐司一向都係咸食，有冇諗過可以咸甜一齊食？呢個芋芋鬆就係芋泥做base，上面舖滿肉鬆睇落去勁豐富！
食落個feel都幾夾，芋泥沙沙口感甜甜哋，痴住啲肉鬆，加埋芝麻係上面，諗佢唔到又幾襯播！
║韓式邪惡芝士熱狗棒
雖然corndog好似現成都有，加咗層濃厚嘅Mozzarella，即刻昇華咗唔少！
║薯餅
平日先會跟吐司送，都加咗芝士，好味！
║蝶豆花青檸
呢個真係超igable嘅！紫色嘅漸層，飲落唔會太酸，反而好fresh！
║百香果乳酸
乳酸個個都好鐘意飲！百香果酸酸甜甜咁，好開胃！
▌執著每點細節 美味從此而來？
見老闆份人望落幾nice，小編膽粗粗問吓有咩秘方整到咁好食。原來佢哋好執著於細節，吐司會預先烘一次，到出餐之前會再烘一次，咁做係為咗保持吐司嘅香脆程度。
滑蛋炒嘅時候保持高速不停炒勻，目的係令到蛋嘅夥粒變得更細，做出綿滑嘅效果
▌連繫社區 成社區團購取貨點
係等待吐司嘅期間，發現都有幾多街坊嚟同老闆傾計，當中唔少仲係嚟拎本地小店嘅團購，好似香港製造嘅清潔劑、本土bagel等等，雖然近年公民社會陷入低谷，人同人嘅信任都愈嚟愈少，但係老闆仍然努力維持呢種互惠互利嘅生態，經營社區內嘅關係，真係好值得支持！
▌元朗國以外 長沙灣都有分店！
除咗元朗國之外，佢哋係長沙灣都有分店，想嚟個quick lunch、萬歲tea或者light supper，不妨多多支持佢哋呀！
【揀飲．簡食記全新會員系統 BEST CLUB，立即加入獲取更多獨家優惠 !】
Toasting
地址：元朗豐年路7號豐年樓地下A2A號舖 | 長沙灣順寧道338號
營業時間：早上11時30分至晚上8時
INSTAGRAM: toasting_hk
0 個留言