【屯門美食】紅橋大人氣拉麵 「道」 濃厚雞白湯 醬油鷄清湯拉麵 ｜值唔值得排個半鐘食碗麵？

屯門紅橋後街，隱藏住一間超人氣拉麵店，每日都吸引大量食客慕名而來。無論午市定晚市，門外總係大排長龍，閒閒地都至少要等個半鐘先有得食！究竟呢碗拉麵有咩魅力？今次熊仔小編就同大家一探究竟，睇下係咪真係值得一去！

未入門先感受人氣 等位要有耐性

呢間「道」拉麵位於集合唔少美食嘅紅橋，舖頭位置真係唔起眼，見到「齊記美食」轉左行入去，喺公園旁邊嘅大廈地舖。

小編平日晏晝時段到訪，店舖中午12點先開門，但11點幾已經有人龍出現。店面唔算大，只有十幾個吧檯座位，如果排隊號碼比較後，好似小編拎到27、28號籌，基本上都要預等到下午1點半之後先有得入座。同埋店家只會派人頭飛，唔接受代拎飛（俗稱「解壓縮」），所以記得要人齊一齊排呀！

招牌拉麵各有千秋：淡麗醬油 vs 濃厚雞白湯

雖然要等好耐，但店內環境裝修得幾有格調，比一般拉麵店更顯精緻。十幾個座位都係吧檯設計，可以近距離欣賞到師傅用心製作每一碗拉麵嘅過程。

主打四款拉麵，分別係「雞白湯拉麵」、「鹽雞清湯拉麵」、「醬油雞清湯拉麵」同埋「濃醬油雞清湯拉麵」，另外有兩款小食同幾款日本飲品，仲有生啤可以飲，幾似日本啲拉麵店。

醬油鷄清湯拉麵

店家話雞湯底經過20小時慢火熬製，再配上自家調配嘅醬油。湯頭飲落清澈鮮甜，面頭嘅一層雞油增添咗唔少香氣。

雞叉燒選用熊本雞肉，肉質嫩滑，微燒過好有炭燒香味。麵條方面用咗中幼身拉麵，口感有啲似中華拉麵，掛湯能力唔錯，可以大啖大啖「雪雪聲」咁食。

雞白湯拉麵

呢款拉麵上檯前，店員會將雞白湯打到起泡。據店員介紹，湯底只係用雞同鹽，經過8小時熬製而成。湯頭入口順滑，充滿濃郁嘅雞肉香味，creamy得嚟又唔會覺得膩。

唐揚炸雞 

呢度嘅唐揚炸雞都係即叫即炸，但就同平時拉麵店食開嘅好唔同，食落比較似雞天婦羅多啲，炸衣同雞肉會有啲分離，但雞肉本身非常juicy，都幾新鮮！

華味鳥刺身

原來每期佢哋仲會推出唔同嘅隱藏餐單！小編到訪當日，就有華味鳥刺身。雞肉刺身可能比較少見，但食落口感同魚生分別不大，容易入口，同時又食得出雞肉嘅味道，鍾意嚐鮮嘅話絕對值得一試！

高質拉麵值得一試 但戶外等候需有準備

整體嚟講，「道」嘅拉麵質素的確非常高，無論湯底、雞叉燒定麵條都做得好出色。不過，要喺日曬雨淋嘅戶外環境等候個半鐘，而且附近公園多蚊蟲，真係需要做好準備呀！

你又會唔會為咗呢碗拉麵，花個半鐘時間去排隊呢？不妨留言分享你嘅睇法！