新歌速遞｜香港J-pop樂隊 203雑貨屋全新單曲《次の春まで》 《命運石之門》經典化作無盡等待？

人同人之間嘅關係，最無奈莫過於自己控制唔到嘅情況。當一個人執意離開，你越想平復心情、越叫自己唔好去諗，回憶反而越發清晰。本地獨立樂隊203雜貨屋最近推出的全新單曲《次の春まで》，就將呢種無能為力嘅情感，同埋希望對方以第二個形式陪喺自己身邊嘅渴望，寄託於呢首單曲之中。

「當有個人無論如何都要離開你嘅時候，會好想平復心情、令到自己唔好再諗。後來發現其實係唔會做得到，因為嗰個人曾經出現過喺你嘅生命入面…我就想藉住呢首歌抒發自己嘅心情、好渴望嗰個人就算係以第二個形式，都可以繼續陪喺自己身邊…」

既然無辦法強行抹去存在喺生命嘅點滴，不如藉住音樂去抒發、釋懷？新歌正正流露住呢種渴望嘅情感。

點解會用「Do Do Ru」？動漫經典化作無盡的電話來電

聽呢首歌嘅時候，大家都一定被「do do ru」呢個魔性嘅旋律洗腦。作為一隊主打J-pop風格嘅樂隊，原來呢個係一個小彩蛋嚟！

樂隊主音同埋Bass手 Sarah講到，寫歌嗰陣時咁啱重睇緊《命運石之門》，動漫中其中一個最 Signature 嘅位，就是主角經常會講嘅「do do ru~」。呢個聲聽落亦都好似電話來電嘅聲音，所以就將呢個原素放入歌入面，貫穿整首歌，一直等待佢嘅來電。

MV 拍攝驚變「Mission Impossible」！大霧暴雨反成神來之筆？

除咗首歌背負住好重嘅情感，今次 MV 嘅拍攝過程都係一場大考驗，全部都係佢哋自己一腳踢。

「真係 Mission Impossible！最尾咁都影到好多相同埋完成晒所有 shot，完全係意料之外。」

本身佢哋諗住要一個藍天白雲嘅背景，有日光個畫面一定靚啲。打拍攝MV最後一日原訂係上山拍，但天氣不似預期，落雨兼超大霧！開頭佢哋都取消放棄，但因為其他成員同團隊嘅時間又好難約，最尾都選擇硬着頭皮繼續拍攝，加上Sarah嘅鏡頭都要攞走把遮拍，結果係山頭上面淋咗成個鐘雨。

不過呢個辛苦都值得嘅，因為啲霧好啱個意景，出到嚟嘅feel好正！即使暫時困喺迷霧之中，只要繼續堅持，終有一日都會變成最靚嘅風景！